ភ្នំពេញ៖ នៅថ្ងៃឈប់សម្រាកបុណ្យភ្ជុំបិណ្ឌចាប់ពីថ្ងៃទី១២ ដល់ថ្ងៃទី១៦ ខែតុលា ឆ្នាំ២០២៣ មានពលរដ្ឋ ជាពិសេសកម្មករកម្មការិនីរោងចក្រជិត ៦ម៉ឺននាក់បានធ្វើដំណើរដោយជិះរថយន្តក្រុងសាធារណៈឥតគិតថ្លៃដែលរដ្ឋបាលរាជធានីភ្នំពេញរៀបចំជូនតាមអនុសាសន៍របស់នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានគូសបញ្ជាក់ឱ្យដឹងថា រដ្ឋបាលរាជធានីភ្នំពេញបានបញ្ចេញរថយន្តក្រុងដឹកអ្នកដំណើរចំនួន ៤៥៥គ្រឿងសម្រាប់ដឹកពលរដ្ឋ និងកម្មករទៅស្រុកកំណើតក្នុងឱកាសបុណ្យភ្ជុំបិណ្ឌ ដោយប្រើប្រាស់ជាង ១៥០០ជើង។
តាមការបញ្ជាក់ពីអ្នកនាំពាក្យ ពលរដ្ឋដែលទទួលសេវាកម្មរថយន្តក្រុងដោយឥតគិតថ្លៃច្រើនជាងគេ គឺនៅខេត្តសៀមរាប បាត់ដំបង និងខេត្តបន្ទាយមានជ័យ។ លោក ម៉េត មាសភក្តីបញ្ជាក់ថា ពលរដ្ឋដែលប្រើប្រាស់សេវាកម្មរថយន្តសាធារណៈដោយឥតគិតថ្លៃនេះវាចំណេញដល់ពលរដ្ឋមិនចំណាយប្រាក់កាក់ច្រើន និងទទួលបានសុខសុវត្ថិភាពផងដែរ។
គូសបញ្ជាក់ថា រាល់ពេលមានបុណ្យទានធំៗ រាជរដ្ឋាភិបាលតែងតែយកចិត្តទុកដាក់ និងបញ្ជាឱ្យរដ្ឋបាលរាជធានីភ្នំពេញរៀបចំរថយន្តក្រុងដឹកពលរដ្ឋទៅស្រុកកំណើតដោយឥតគិតថ្លៃដើម្បីសម្រួលដល់ពលរដ្ឋ៕
